一位署名「求補」男讀者來信談及，近日有性慾下降迹象，就算已有興致行房，亦覺力不從心，欲以食療進補，聽朋友說海帶對男性生理有補益效用，不知是否真有其事，故來信查詢。
大海蘊含豐富嘅資源，亦為人類帶來豐富美食，魚、蝦、蟹、蠔統統都生於大海，滿足我哋嘅口福。當然，大海除咗擁有以上識得郁嘅美食之外，唔識郁嘅美食亦有，佢就係海帶喇！海帶呢種高纖低脂食物對於女性當然係恩物，但係對男人亦都一樣係寶！
因為海帶含有豐富碘質，可以保護甲狀腺健康，預防性慾下降以及性功能減退嘅問題。另一方面，海帶亦含有豐富嘅鋅以及多糖體，而吸收足夠嘅鋅就可以預防精子數量減少以及精子質素下降嘅問題；多糖體則有抗凝血作用，可以預防動脈粥樣硬化，從而減少勃起功能障礙。中醫亦認為海帶具有舒肝理氣嘅功效，肝主血，肝機能得到改善，血液先可以提供充足，令男士於興奮狀態之時，得以保持堅挺！所以大家得閒不妨食番碗海帶綠豆沙，或者滾個日式麵豉湯再加幾片海帶啦！
賢