本文重點
最近有個朋友懷疑佢個男友除咗佢之外，喺出面仲有另一個女人，於是問我點樣可以知道男朋友有冇一腳踏兩船。大佬，我又唔係啲玄學大師，呢啲嘢我又點知道喎，不過喺心理測驗方面，都有一個可以玩吓嘅。
當你食飯嘅時候，你口裏面有半塊肉咬緊，碗裏面仲有半塊肉嘅時候，你嘅雙眼會望住？
選擇：1. 飯裏面嗰半塊肉 2. 餸碟上另一塊肉 3. 枱上其他嘅菜式
答案分析
1. 飯裏面嗰半塊肉
呢種男人只會睇住自己碗裏面嘅肉，佢哋一啲野心都冇，而且唔鍾意同人競爭，只要顧掂自己就可以，佢對女朋友相當專一，仲會聽晒你話，你話向東，佢唔敢向西，呢種男人冇乜可能一腳踏兩船。
2. 餸碟上另一塊肉
呢種男人有啲野心，做佢嘅太太同女友要千萬小心，事關佢哋嘅性格絕對係不安於室，只要有少少機會都會偷食。最唔要得嘅係佢哋駕馭能力有限，通常都會搞出大頭佛，佢同佢身邊嘅人都會痛苦。
3. 枱上其他嘅菜式
呢種男人嘅野心最大，懂得顧全大局，心思十分縝密，做事計劃周詳。有關男女之事，佢唔會輕易出手，但只要出手就一定成功，做佢哋嘅太太同女朋友，到咗發現嘅時候，亦只能接受，千萬要小心。
小德