一位署名「禿鷹」男讀者來信問及，佢未過四十，經常腰痠、背痛、頭暈、眼花及腳軟，經診斷過後，證實係腎虧之症。最令佢頭痛嘅，就係大量脫髮嘅問題，又唔知係咪同腎虧有關，同時亦想問吓有冇防止脫髮嘅食療。
其實脫髮嘅原因有好多，包括遺傳、脂溢症、營養不良、生癬乃至性病梅毒等，但最常見就係腎氣不足。照中國古書記載，髮為血養，因腎氣好而茂盛健康，如果腎虧嘅話，腎氣不足，則頭髮必多脫落，亦會出現開叉或容易折斷嘅情況，顏色變得枯黃。
所以「養髮必先強腎補血」，呢個係中國嘅民間常識，而近代好多研究報告指出，如要頭髮靚，則須雌激素分泌旺盛而又正常不逾量，因為頭髮嘅營養嚟自雌激素。
至於養髮食療，當然唔少得雌激素頗多嘅黑豆。黑豆性味甘、平，無毒，能活血、祛風、清熱解毒、滋養健血，當然仲有補虛烏髮嘅功能。此外，黑豆含豐富營養，而且容易被人體吸收，最簡單嘅食用方法係黑豆煲水，食鹹食甜則就個人喜好而定。
陽起子