男友騙初夜
今年28歲嘅Alexa Rae，佢畀人呃嘅經驗最多，單係金錢上嘅損失，大大話話都有幾十萬港元，計埋其他非金錢上嘅損失，真係不計其數，至於Alexa點解咁容易畀人呃，佢話：「可能同自己比較單純有關，成日希望幫人，點知就畀人呃埋！」Alexa話：「我父母自細就教我，多啲幫助有需要嘅人，所以我自細就會將晚飯留一半，然後第二日返學嘅時候，送畀街角嘅流浪漢食。起初我以為咁做好啱，直至幾年後，個流浪漢暴斃街頭後被警方發現，原來佢不知幾咁有錢。」Alexa第一次嘅好心就係畀流浪漢呃咗，至於佢嘅初夜，又係咪畀人呃呢？Alexa話：「記得有晚我男朋友打電話畀我，話父母出外唔會返嚟，但佢又唔記得帶鎖匙，搞到無家可歸，於是求我畀佢借宿一宵，我咪瞞住父母偷運佢入房囉！之後佢瞓唔着，我哋坐喺張床上面傾偈，傾傾吓，就咩嘢咩嘢囉……」
受唔住誘惑
咁佢父母唔喺屋企、佢冇帶鎖匙又係真定假呢？Alexa話：「我冇再問佢啦！半年後畢業，就各散東西。」唔使審九成畀條衰仔呃咗，咁畢業後出嚟做嘢，又有冇畀人呃呢？Alexa長嘆一聲：「多到數唔晒，識嘅又呃，唔識嘅又呃。」
咁Alexa除咗被人騙財騙色之外，其他畀人呃得最多嘅又係乜嘢呢？
Alexa話：「由於我好喜歡小朋友，所以好多朋友走嚟呃我去照顧小朋友，通常照顧一兩晚，最長照顧咗一個20個月大嘅嬰兒半年，仲要帶埋佢去開工，認真搞笑。」至於另一位靚女Crissy Moran，佢今年34歲，照計江湖閱歷豐富，冇咁易受騙，點知佢話：「我耳仔真係好軟，畀人氹得幾句就會信人，最多就係畀啲上門推銷員呃，成千蚊嘅家庭用品，買完一套又買一套，最後多到要送畀人。」
小心西裝友
Crissy繼續道 ：「出街買嘢都係一樣，所以啲售貨員最鍾意見到我，我曾經搵男朋友嚟控制我，等我唔好咁易上當，點知佢同我一樣，畀人一氹，又齊齊買大堆垃圾返屋企，後來認識到我家陣嘅助手，佢幫我避開晒啲誘惑，令我慳咗唔少錢。」
咁仲有乜嘢要小心嘅呢？Crissy話：「有好多投資顧問會嚟搵你，我唔敢話佢哋呃人，但買之前大家真係要考慮清楚，我好多朋友都係咁冇咗好多錢。抗拒嘅方法，就係將啲錢畀晒男友去投資，蝕咗要佢賠番。」Crissy咁聰明，呢鋪有賺冇蝕啦？Crissy話：「托賴今次風暴冇乜損失，除咗投資，唔少人會叫人做慈善捐錢，呢方面一樣要小心，千祈咪上當，因為老千唔一定喺街頭行騙，着晒西裝嘅更加要小心。」真係肺腑之言呀！
撰文：小德