啲女仔成日話要節食減肥，實在唔係一件好事，好似小記一個女性朋友，自從減肥之後，不知何故，手足尖經常變得冰冷，無論冷熱天嘅情況都一樣，更畀男友取笑似「鬼手」，搞嘢時經常要求請佢小弟食「凍柑」。雖然玩得過癮，但始終身體唔好先會出現呢種情況，朋友亦懷疑自己因減肥而導致嚴重貧血，唔知道應該點做先好。
其實因減肥而搞到身體出現毛病嘅例子確實不少，常見為營養不良，不只會貧血，仲可能會影響神經系統嘅機制，譬如自律神經，因營養不良而受影響時，可造成肢端冰冷嘅情況，亦可以令到體內嘅副腎腺受到影響，進一步削弱抗病機制。如果證實因減肥而弄至貧血，嚴重者不只手腳冰凍，單是缺鐵性貧血，就好易引發胃乃至十二指腸潰瘍，甚或腸胃炎、泌尿系統發炎、牙周炎、唇炎、口腔黏膜炎等，所以最好作適當嘅食療補充。
如果年紀不大，又冇血液循環系統毛病，不妨嘗試幾款有益菜式，如豬肝（剁碎）蒸雞蛋、薺葉炒肉鬆、清炒菠菜、黃豆排骨湯（亦可與豬肝一同煲粥）；若然鍾意食甜，就可以嘗試桂圓、紅棗、蓮子煲糖水；欲藥食同療，亦可選用雞血藤、桑椹子煲粥，亦不妨多食紅糯米煲粥，有助補充體力。
娟娟