小娟放學之後，冇即時返屋企，竟然走咗落去旺角，跟住喺砵蘭街一帶消失，有同學目睹呢件事，於是返到學校唱通街，史Sir聽到呢個消息，於是叫小娟嚟教員室問清楚佢發生乜嘢事？史Sir問：「你放學唔返屋企，究竟去咗邊度呀？」
小娟話：「咪去咗搵我嘅Sweetheart囉？」史Sir一怔：「你嘅Sweetheart？係男定係女呀？」小娟甜絲絲話：「係男仔嚟架！佢好型仔架！又識氹我開心，我每日見少佢一面都唔得呀……」史Sir阻止小娟講落去：「呢件事情你家人知唔知道？」
小娟馬上回答：「我阿娘當然知道，事關佢都養咗一個！」史Sir不明：「養咗個乜嘢呀？」小娟正色道：「佢嘅至愛呀！佢好大隻，又好打，但見到我阿娘就頭耷耷，扮晒可愛咁樣，一衝動就撲去伸晒條脷出嚟錫我阿娘，搞到佢哈哈笑。」
史Sir聽到滴汗：「咁你同你嘅Sweetheart有冇親嘴呀！」小娟爽快地：「當然有啦！」史Sir謹慎再問：「咁你哋有冇一齊瞓過覺呀！」小娟話：「梗係有，我晚晚都攬住佢瞓，唔係佢打架受咗傷，我哋都唔使分開呀！」史Sir一氣，當場暈倒。
各位聰明嘅讀者，大家估唔估到小娟口中講嘅Sweetheart，究竟係乜嘢呢？
1. 男性朋友 2. 男性公關
3. 男性狗仔 4. 男性情夫
答案：3. 男性狗仔
解釋：原來小娟口中講嘅Sweetheart，係佢家養嘅狗仔，小娟養嘅係細狗，而娟媽養嘅係大狗，兩隻狗有日打起嚟，齊齊受傷入咗寵物醫院，所以小娟放學就走去探佢，點知史Sir聽得一半，問得一半，最後更自己嚇到暈咗，九成諗到其他嘢，今次真係唔怪得人喇！
小德