有人問，發現身體功能開始轉差，好想做運動嚟鍛煉吓，但因為工作較忙冇時間，去唔到公園或者健身中心做運動，應該點辦？我建議大家返工放工嘅時候，少坐啲車，多行啲路，又唔係叫你由屋企行返公司，但可以早一兩個站落車，行幾步去目的地。
據一項醫學研究發現，經常坐喺度唔郁嘅人，同一啲有步行習慣嘅人比較，經常坐嘅人性勃起障礙發生嘅比率，多過有步行習慣嘅人一倍有多，所以每日花十零分鐘，好好用吓雙腳，對身體同性功能，都會有莫大嘅好處。
欠缺運動，幾乎係所有現代白領男士嘅通病，而最明顯嘅另一病徵就係有便秘嘅情況，愈長時間缺少運動，便秘嘅情況愈嚴重，連帶會出現早洩、射精疼痛、甚至無法射精等情況嘅出現。但當便秘嘅情況一改善，以上講嘅性毛病，亦會同時消失。
所以開始出現便秘，就千祈咪再忽視，中醫認為便秘係同大腸經有關，而大腸經係同肺經陰陽互補，所以多啲做運動，得閒行多幾步，等肺部多啲活動，令你大腸都得到滋潤，便秘問題自然就會解決，連帶性功能嘅疾病，都可以不藥而愈呀！
小德