捧完盃再衝傑志乘勇轟晉峰

晉峰各項賽事6連敗，總教練何信賢承認球隊表現欠佳，期望一眾有傷在身的球員，經新年假期後能重拾狀態。對手傑志剛捧走「高級組銀牌」冠軍，「何Sir」笑言今場交手並不合時：「傑志初一踢咗場決賽，我哋就停咗兩星期，唔敢諗太多，盡力踢場好波啦，尤其佢哋多埋伊高沙托尼，進攻變化更多。」剛加盟的陳肇鈞今場有望擔正，惟艾拔簡勞因傷繼續缺陣外，另一中堅曾仲楠亦要停賽。

陳肇鈞（Philip）相隔大半年再次落班，「地標戰」便倒戈前球隊傑志，他表示會以平常心面對，首要目標是重拾比賽的感覺：「希望第一場波就踢到平時水準，拎到好開始，最低限度令傑志踢得冇咁易。」

傑志剛於「高級組銀牌」踢足120分鐘，總監兼主教練朱志光承認體力有一定消耗，但球員經休息後已大致恢復。「藍鳥」捧走今季第一冠士氣正盛，「朱Sir」卻提醒球員不能鬆懈：「往往球隊攞完錦標之後，表現會突然間滑落同走樣；晉峰攻力唔弱，尤其多埋Philip之後。」

上場傷愈復出的後衞艾里奧（Helio），比賽期間再被撞爆嘴唇，他指縫針後已無大礙。Helio同樣指晉峰簽入Philip後實力必有所提升：「Philip係一個好球員，佢同費利浦薩相信會為我哋製造唔少麻煩，加上青衣場比較細，要破密集有難度。不過如果想攞聯賽錦標，就一定要贏呢啲艱難嘅比賽。」