政情：張秀賢有借未還 欠街數料過百萬

尋晚以苦主身份出席網台節目嘅渾水，依舊以「為存厚道」嘅理由，唔肯開名，但就以「前政客」嚟形容呢位債仔。佢話喺6年前，對方先後以政治同家庭原因問佢借錢，欠債高達6位數字。近日對方應承，用6至7年嘅時間還錢，每月還款唔夠3,000元，相信對方會以螞蟻搬家嘅方式嚟處理債務。渾水強調呢個還債方案，當中並無起佢「釘」，做法可謂非常寬裕，以致呢個還債方案一曝光，就有人想問佢借錢嘞。渾水又話，對方還嘅錢都會攞去做慈善用途，反正佢預咗呢筆錢係收唔番，但佢強調做債仔嘅基本素養，係要畀人睇到有還錢意願，唔可以吃香喝辣、養車旅行，同埋切勿同債主失聯，否則會被視為捲款而逃，仲邊有朋友做呢？

渾水又話，一個大學畢業生，依家搵一份3萬多元收入嘅工唔係咁難，叻啲嘅話5、6萬元都有，如有額外資金需要可以借稅貸，利息好低，但好似「前政客」咁周圍左借右借，估計頂多咪係借3、4百萬，但賠上自己嘅信譽，唔值得。佢又話「前政客」所屬嘅陣營已經冇得發揮，明白投身政治嘅人要轉行好難，但腳踏實地的話，仲有好多路可以行。渾水又話佢提到議員葉劉淑儀，並非指「前政客」已投身葉劉嗰邊，認為做政治公關都好脗合呢位「前政客」嘅人脈網絡。

至於有關網絡上嘅苦主群組，渾水澄清話唔係佢開，亦唔係苦主群組嘅擁有人、管理員唔係佢，亦冇幫事主做債務重組。其實渾水較早前都喺社交平台貼文話，相關嘅債主搵佢都冇用，應該獨立去同番事主講。

已移居外地嘅深水埗前區議員李文浩就貼文，講番3年前出席飯局之後，有人就話李撐佢組黨參選立法會，但其實李並無支持過佢，重申「我真係唔識你㗎。」雖然李並無開名，不過就附上張秀賢被指欠債嘅報道。