政情：無懼路遠 馬浚偉柯仔晨早送暖

原來佢哋係去送暖。觀塘區議會主席柯創盛依家間唔中都有開咪，佢尋日社交平台貼文，話上周五拍住藝人馬浚偉喺電台開咪嘅時候，有聽眾提議佢哋喺寒冷天氣下，要多啲關顧獨居長者，於是佢哋就立即跟進。話說柯仔、馬浚偉、觀塘民政事務專員林兆康同一班青年義工，尋日去咗公屋探訪一班獨居長者，仲見佢哋行樓梯上上落落，探咗幾個家庭。

柯仔話好多獨居長者、露宿人士同基層家庭等都欠缺禦寒物資，要度過寒冬，冷暖自知；但佢哋絕對唔係被遺忘嘅一群，儘管送嘅只係一張棉被、一啲物資、一啲小心意，甚或只係一聲問候，都期盼佢哋喺寒冬中，仍能得到一份關懷同溫暖。