要聞港聞

鼠患垃圾未解決 官僚例牌多狡辯

新冠疫情最嚴峻期間,本報關心社會關心民生,曾以跨版圖文並茂指出「骯港受盡摧殘,市民難過疫關」,力陳「三無大廈乃人間地獄」,要言之,老鼠橫行,垃圾圍城,成為香江奇觀!呢嗱,一年容易又冬至,好快又2023年喇!政府今年8月展開為期3個月嘅全港清潔運動,究竟各區鼠患有冇改善呢?垃圾黑點又有冇變走咗?
各位,全港18區均有鼠患,只係有些區好嚴重,好似油尖旺、深水埗、觀塘等,有些區就不至災難,好似離島及南區。最多投訴鼠患嚴重嘅,相信係公共屋邨,去年紅磡邨有居民拍下「鼠輩橫行」震撼畫面,只見紅日樓一單位外牆至少有7隻老鼠「排排企」準備覓路遁走!日光日白都咁浩蕩,夜晚巡遊肯定大操兵喇!
嗱!尋日喺立法會大會上,有議員提出口頭質詢,要求局方回應政府接獲嘅公共屋邨鼠患投訴情況,及潔淨服務承辦商合約針對鼠患嘅指標;又有議員指公屋居民面對老鼠入屋問題,因公屋潔淨服務承辦商合約不包括入去居民單位處理鼠患,詢問局方會否考慮更改合約,增加專項,協助居民處理。事實上,早有團體批評房署外判嘅清潔公司喺滅蟲鼠嘅處理手法各有不同,並冇統一標準;又有批評對此等外判公司欠缺監管。本報經常拍到食環署嘅外判員工蛇王,即為明證。
呢!房屋局局長回應,就話會從老鼠「食住行」三方面處理鼠患問題,又指屋邨鼠患主要成因係有人餵食動物,垃圾未能妥善清理,商戶未能妥善處理食物殘渣,未來會增加宣傳,提高居民衞生意識;又話喺鼠患嚴重嘅地方設置網絡錄像監察系統、設立夜間巡查小隊等。官僚搬出十八般武藝,卻原來本年度截至11月共捕獲1,720隻老鼠。喂,捉到17,200隻都嫌少啦!花咁多公帑先捉得嗰千零隻,笑死人!100隻老鼠繁殖一晚分分鐘都成千隻啦,有乜辦法香江唔處處有鼠蹤吖!正是:香江老鼠打橫行,只因官僚皆病貓!老鼠多到貓都唔願捉,而官僚治鼠多推搪狡辯,鼠患點有可能解決?
好嘞!治鼠無能,咁衞生黑點變走咗未吖?早前官僚就話有改善,之但係3個月話咁快過去了,有冇達到訂下嘅績效指標呢?功夫茶相信官僚嘅「有改善」,亦不過又係「差強人意」,反正做一輪大龍鳳,雷聲大雨點小都算有交代喇!「治髒世,用重典」!環境及生態局建議調高亂拋垃圾嘅定額罰款,由現時1,500蚊倍增至3,000蚊;至於店舖阻街及非法棄置建築廢物,則建議上調定額罰款至6,000個大洋,總之罰到你肉赤知驚!有議員認為應推「累進式定額罰款」,才更有力令阻街店舖不再抱罰款當交租心態;不過,官僚嫌執法過程繁複,唔建議實施。一句嫌繁複連狡辯都慳番,果然有效率!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500