要聞港聞

斬人如家常便飯 香江淪動感之刀

一生劍佩走東西,有併吞八方之志。阿哥,如此場面,係春秋戰國時代諸侯爭霸定係民國時期軍閥爭奪地盤?非也非也。係涉6億元毒品案,中環撞車斬人槍擊案?今趟冇咁堅,月黑風高劈人夜啫,幾乎隔三差五總會有,見怪不怪啦!
呢!日前約午夜12時,一名33歲姓黃男子偕一名女友人喺葵芳邨一停車場內準備取車,期間一輛黑色七人車突然駛至,車上兩名持牛肉刀大漢旋即跳落車,不由分說舉刀追斬男事主,同行女友人被嚇至花容失色;遇襲男子右手臂及小腿受傷淌血,兇徒逞兇後跳回七人車逃之夭夭。事主負傷跑至50米外葵健樓一食肆求救,職員及顧客見有「血人」衝入嚟均十分驚慌,有職員代為報案,救護員到場替其包紮後送院。警方封鎖停車場調查,將案件列作傷人案,交葵青警區刑事調查隊跟進,正追緝一名本地男子及一名身高約1.8米南亞漢。究竟涉及情色、錢銀轇轕定係沙塵滾滾斬錯人,有待警方進一步調查。
據悉,涉案七人車駛至停車場一彎位時,車上南亞刀手疑車未停定急於打開車門跳落車「做嘢」,心急過頭令車門撼向路旁石壆致整道車門甩脫遺於現場。其後警方接報荃灣城門道和宜合村燒烤場附近,有一輛七人車起火,消防到場將火救熄後,警方調查期間發現該七人車一左門失去,相信係兇徒犯案後駕車至上址燒車毀證。
各位,假難民、南亞兵團周街劈友、追斬同鄉都真係閒過立秋!佢哋之所以成為香港治安毒瘤,皆因無惡不作,行劫、盜竊、販毒、聚賭、非禮、黑工、加入黑幫等一浪接一浪,罪行劣迹斑斑,將「罄竹難書」呢句成語發揮到極致!呢,有醫學界前立法會議員早前喺社交平台貼文,指喺2022年10月,頭9日就有18個人被刀襲擊,佢將2022年以來有關刀嘅案件地點記喺地圖上,供各位參考,希望大家注意安全喎!呢則貼文引來網民熱議,有指香港真係「動感之刀」喎!事實上,假難民及南亞兵團一直困擾香江,劈友斬人成為家常便飯。難怪有論者揶揄:政府搶人才搶資源搶唔到,反而假難民和黑幫日日通街搶地盤,搞到香港雞毛鴨血!雖是戲言,可今朝都到眼前來!
呢嗱!警方日前喺旺角展開代號「犁庭掃穴」反罪惡行動,搜查旺角區內兩個單位,搗破一個懷疑賣淫場所及一個懷疑百家樂賭檔,喺上述兩個單位拘捕4名越南籍假難民。要言之,警方掃乜穴都好,只要勤拂拭,必定有假難民身影!假難民已經成為香港尾大不掉嘅毒瘤,目前仍有逾1.49萬名聲請者在港,入境處雖然好努力咁加快處理,可惜力度仍然唔夠,港府又話推5招加強處理,遣送政策今個月7號更新!功夫茶希望真係起到作用,何況要說好香港故事,豈容成日上演「小李飛刀」!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500