政情：不忿被睇低 郭玲麗考過電工牌

聽Lillian講，佢家姐當年任職項目經理，因工作需要落地盤，但就被人投以輕蔑目光同嘲笑，搞到佢哋兩姊妹都相當唔忿氣，於是就拉埋另一位金蘭友好，3人行咁去報讀電工課程。雖則全班30位學員當中只得3個女仔，但導師話已經算多㗎啦。

後來Lillian成功通過考試，但未獲發電工牌照，原因係發牌條件既需修畢相關課程，還需一定嘅工作經驗。儘管考試過關，但就欠缺強積金證明受僱於電工行業，加上佢當時就已經教緊書，抽唔到時間兼職做電工，不過電工課程所學習嘅知識，至今都感覺獲益良多。

另外，原來Lillian仲有中藥美容嘅牌照，屬於國家職業技能證書。佢話希望多啲推動內地資歷認證架構嘅證書畀港人，等港人有多啲選擇咁話。