政情：經濟下行司法人員照獲加薪上調2.5％議員炮轟

政府調整法官及司法人員薪酬水平，由本年4月起上調2.5%。立法會財務委員會尋日召開會議，通過「2022至23年度司法人員薪酬調整」。但就有議員批評指，本地司法人員及法官工資高，反問依家經濟狀況差，點解仲要加薪呢？

工資水平高英美好多

科技創新界議員邱達根提到，現時經濟下行，唔少中小企執都執唔切，質疑點解司法人員要加薪，又點解加2.5%？佢又指，本地司法機構工資都好高，舉例話美國嘅法官同司法人員工資按港元計算，月薪為5.8萬至18.7萬元不等；英國嘅法官同埋司法人員工資按港元計算，為7.2萬至21萬元不等。反觀香港法官及司法人員嘅工資，就高達9.3萬至38萬元不等。

對此，政府方面回覆話，唔可以直接同外國比較，皆因兩地生活水平、物價、住屋情況不一。邱不滿答覆，直指需要同外國比較時，政府就比較；有時覺得唔使比較嘅時候，政府就唔比較，質疑政府未來如何撰寫報告。

調薪因素比重欠透明

議員黎棟國就話，政府每次調薪都考慮十幾個因素，但其實冇交代因素嘅比重，形容完全係黑洞，到最後大家只會關注薪酬趨勢調查，建議諮詢持份者意見，否則每一年都要進行辯論，來年又傷大家感情、損害工作熱誠。政府就回應話有關機制已經沿用十幾年，會向薪酬委員會反映意見。

相反，另一議員周小松就認為本次薪酬調整滯後，質疑點解與公務員加薪一樣係上調2.5%，擔心造成人才流失。政府承認今年遲咗少少，暑假後已經盡快到事務委員會提出議程，又話加薪會追番幅度。又話調薪考慮12個因素，並非機械式考慮，認為2.5%合理。