政情：健康投資 陳健波倡年輕做起省開支

波哥話本港65歲以上嘅人口比例由2011年嘅百分之十三，上升到去年嘅百分之二十，當中估計六、七成都患有慢性病，而去年慢性病患者就高達220萬。波哥指糖尿病同高血壓之類嘅慢性病，一半都係隱性，唔檢查都唔會知，導致每3人就有一個患併發症，但有併發症先至就醫，醫療成本就會高兩倍。

佢話與其大病先至求醫，不如阻止小病變大病；醫療系統方面，波哥認為專科應針對重症，若果小病都睇專科實在「嘥彈藥」，若果能做到上述嘅安排，咁就輕症重症都快咗，改善覆診排長龍嘅現象，仲可以減少政府醫療開支咁話喎。佢又叮囑市民，健康管理由年輕做起，重申早發現早治療，咁就健康啲、病少啲、開心啲。