政情：愛駒首贏比賽 陳浩濂有錢落袋

前晚嘅賽事，雖則話「日輝煌」屬次熱門，獨贏賠率係5倍，但先後由資深騎師潘頓同莫雷拉策騎嘅「日輝煌」，過去多次出戰嘅成績頂多係跑第二，前晚改由年輕騎師希威森駕馭即凱旋而歸，陳浩濂不但感到驚喜，就連佢嘅屋企人亦彈冠相慶，事關「日輝煌」嘅馬主唔止一人，係陳浩濂同佢爸爸陳兆安、以及兩位家人一齊養嘅。

點解陳浩濂冇入馬場為愛駒打氣呢？原來前晚佢要為活動擔任主禮嘉賓同演講，搞到9點幾先至完成公務，無法趕及愛駒喺9點15分開跑嘅賽事，惟有喺車上面睇直播，結果遙距見證愛駒掄元奪魁。