政情：話廣東冇百強大學邱達根秒被反駁

本港人才流失，政府喺《施政報告》提出多項搶人才政策，包括推出「高端人才通行證計劃」，吸引畢業於全球百強大學、且具工作經驗嘅人士。科技創新界議員邱達根尋日喺立法會大會上，指創科業界缺中高層人員，支持引入人才，但提到「百強大學」，佢話「睇番除咗香港之外，大灣區其他城市係冇嘅。」點知，勞工及福利局局長孫玉菡就話係有㗎！指有9間內地大學躋身百強，而位處大灣區內地城市嘅中山大學就符合百強資格。

當局：小心選擇領軍人才

另外，提出質詢嘅議員嚴剛，話針對領軍人才同優才有別，領軍人才可能要動用公帑，質疑政府係咪會有一段時間檢討政策，對發揮唔到作用嘅領軍人才提出退出方案。議員梁美芬嫌人才政策唔夠搶、唔夠力度；議員黃俊碩就話吸引專才、人才清單冇會計、法律人士，質疑領軍人才未來能否包含上述專業。

對於領軍人才，孫玉菡僅回應話會小心選擇，先會提出優惠政策。佢又話會有具針對性嘅配套考慮其貢獻同埋提供計劃，不同行業要求不一，為入境專業人才來港提供不同計劃、不同便利。佢強調搶人才策略會視乎不同地方嘅措施，但唔適宜在港提出資助金額，又強調香港人才主要係本地人，外來人才嘅作用只係補充香港嘅人才庫。