政情：捧茶餐廳踩點心紙 盧偉國妙喻建屋爭議

WK尋日又去幫襯茶餐廳食早餐，話粉麵嘅配搭經常唔同，跟住就引伸到政府身上。佢話港式茶餐廳素以價廉物美、快捷便利，廣受街坊歡迎，而為政者更要體會茶餐廳文化嘅靈活變通，掌握民情民意，至係解決民生問題嘅重點，即是孔子所講嘅「眾惡之，必察焉；眾好之，必察焉。」但佢又認為，政府唔能夠只睇眼前民意嚟施政，特別係一啲長遠嘅政策，市民未必理解，所以政府就要加以說明、引導嘅，否則只靠民調「點心紙」，就唔係前瞻性。

到底佢想表達乜嘢呢？其實係講緊搵地。WK舉例話本港土地房屋供應嚴重不足，政府要積極「造地」，不過向棕地打主意「改變現時有用途的土地」，相關嘅中流作業、農業、回收業勢必被趕走，亦難免收回體育場地同民居旁邊嘅休憩用地，可能造成更大嘅社會矛盾。反而開發荒置土地，例如生態價值低嘅綠化帶、郊野公園邊陲同近岸填海等，都係唔使賠償、唔使安置，因何不開發？佢話25年來造地停滯不前，依家要急起直追。

咁造地同茶餐廳文化有乜關係？說穿了，就係近排因為收回粉嶺高爾夫球場部分用地建屋，同埋用綠化地同郊野邊陲土地建屋再次惹起爭議。有聲音質疑收回高球場而唔用郊野公園邊陲地帶建公屋，係當年土地大辯論剔「點心紙」嘅民意調查結果，斥做法唔科學，亦唔能夠令政府加快建屋，相信WK都係想叫政府要睇實際嘅需要嚟變招，而唔係抱殘守缺。