政情：政府影都冇區會勢追數

啟德無單軌車交通難疏導

政府早於2009年提出「啟德環保連接系統」計劃，討論喺啟德、九龍灣、觀塘周邊實施單軌鐵路，但2020年政府擱置該計劃。九龍城交通及運輸委員會尋日開會，促請政府重啟連接觀塘嘅啟德單軌列車項目，但土木工程拓展署並未有派員出席。區議員張景勛話，啟德面對交通擠塞，新嘅水上的士只係觀光用途，並非用於惠及居民，一旦啟德有大型活動，屆時造成嘅交通問題恐怕會更嚴重。佢促請政府部門下次會議派員出席，否則將會聯同立法會議員向政策局追數。

會議上，區議會主席何顯明指出循環線、多車卡嘅單軌列車，可以迅速將市民送去各港鐵出入口，加強接駁用途，希望政府考慮。區議員左滙雄直言，單軌列車有需求，政府唔可以話因為成本問題，就將十年研究計劃胎死腹中，認為成本有問題應該諗辦法降低成本，向市民提供折衷方案，而非白白放棄十年嘅時間同資源。

憂難應付大型活動

提出議案嘅張景勛引述政府表示，啟德郵輪碼頭雖提供水上的士，然而只屬於觀光用途。撇開不談疫情期間水上的士停駛，即使平日頭班船都只係早上11點，未能配合上班族嘅返工時間，更遑論便利居民。佢又估計，如果啟德舉行大型盛事，前往參觀同遊玩嘅市民將數以萬計，單單靠水上的士、附近嘅巴士路線、港鐵等根本難以疏導，促請政府重新考慮單軌方案。

至於土木工程拓展署未有派員出席該次會議，張景勛話已經唔係第一次，下次交通及運輸委員會續會嘅時候，將會再討論呢個議題，希望屆時政府派員出席，揚言如果都係唔見影嘅話，將會聯同立法會議員向政策局局長追數咁話喇。對於有意見指單軌列車要避開觀塘區等技術難點，即由九龍灣連接至郵輪碼頭，張景勛認為單軌列車本來就為咗疏導啟德以及觀塘嘅交通問題，所以必須堅持連接到觀塘，甚至乎連接埋牛頭角一帶。