政情：今屆最高未破張華峰紀錄梁君彥議助月𢭃6.9萬

今屆立法會議員每年可申領嘅辦事處營運開支逾280萬元，一眾議員對於幕後嘅助理亦唔手緊，唔少議員助理人工都頗豐厚，其中人工最高嘅議助係立法會主席梁君彥嘅助理，月薪達6.9萬元，薪金直逼區議會主席。之不過，呢個款額都仍未超越上屆金融服務界議員、亦即係佢黨友張華峰（肥老闆）嘅紀錄，當時佢其中一名議助月薪接近7.4萬元。

今屆議會舊人繼續用「銀彈」攻勢留低資深議助，其中林健鋒就請咗7個議助，最高月薪嘅議助有6.23萬元，新界西北地區直選議員田北辰就請咗8個人，人工最高嘅有6萬元。鄉議局功能界別議員劉業強更請咗10個人，薪金最高嘅為6.3萬元；另一方面，由於初嘗議事經驗，唔少議會「新丁」都以高價請議助，務求盡快上手，其中選委會界別嘅鄧飛同進出口界功能界別議員黃英豪，就分別以5.3萬元同4.8萬元請議助。

用咗6.8萬元聘請助理嘅新界北地區直選議員張欣宇，自認議員生涯屬起步階段，需要一個資深人士協助，而該職員本身係資深議員助理，熟悉政治同議會事務，又曾任職智庫同商業機構。之不過，佢都話依家立法會嘅經費不足，可能要自己補貼開支，或要同其他界別議員商討共同聘請職員同營運辦事處。

聘顧問幫手差距大

喺議員助理嘅協助之外，唔少議員都請顧問幫手，不過薪水差距好大。例如建築、測量、都市規劃及園境界議員謝偉銓以4.1萬元請顧問公司，協助社交媒體策略；選委會界別嘅劉智鵬就以1.8萬元請顧問協助類似嘅媒體管理，相反李鎮強就只係用咗8,000元請顧問，為佢提供議會事務嘅建議等。至於同為選委會界別嘅陳曼琪同李浩然分別用一萬元同5萬元，請研究法律嘅顧問，分別研究香港法律及跨境法律調查，以及內地民商事判決等，其中李浩然一個報價更高達10萬元。