政情：懶理名人宣傳大 麻禁毒處捱罵

話說喺立法會保安事務委員會尋日討論有關修訂《危險藥物條例》（第134章）附表1及《化學品管制條例》（第145章），同埋本港嘅毒品問題。有議員好關注大麻問題，而禁毒專員李基舜話當局擔心其他國家對大麻嘅興起，加深本港打擊難度，會繼續加強教育同宣傳。海關助理關長胡偉軍亦話會加強查驗從高風險國家入境本港的包裹或貨物，從源頭堵截任何毒品流入本港。

議員李梓敬就舉例話，如有本地知名人士前往荷蘭後，喺社交平台上載吸食大麻嘅相片同影片，向大眾宣傳大麻，問當局會唔會考慮對有關個案作出回應，又話從未見過禁毒處開名譴責鼓吹吸毒嘅人士、作出反駁或要求社交平台公司刪除有關貼文。李基舜就解釋，當局唔會針對個別人士，若情況嚴重便會適時嚴厲譴責。

另一議員黎棟國對呢個答案顯然唔滿意，批評咁嘅做法唔夠堅定，應該立即作出恰當嘅回應先啱，仲建議當局進行網上巡邏時，要盡快行動添！