政情：傳在囚長毛確診 邵家臻澄清咪當真

由於消息講到「似層層」，醫院管理局總行政經理（綜合臨床服務）李立業尋日出席記者會交代最新疫情，就被問到長毛入院嘅傳言，而佢嘅答覆就係冇相關資料。另一方面，長毛嘅舊同事，前議員邵家臻尋日下晝喺社交平台貼文澄清，指長毛喺獄中確診，身體狀況急劇轉差嘅消息實屬謠言，又引述長毛太太陳寶瑩嘅說話，指長毛並無確診新冠肺炎啊。及後陳寶瑩亦透過長毛嘅社交專頁，指自己如常探訪長毛，證實並無染疫，據知近期入院係做檢查，又話喺監獄嘅閉塞環境中，情緒起伏在所難免。

雖然長毛無確診，不過就算喺獄中染疫都不出奇。早前第5波疫情高峰期，懲教院所入面都出現多宗確診個案，當時都有傳正在服刑嘅前職工盟秘書長李卓人都中招啊。至於長毛現因多宗組織及參與非法集會嘅案件正在服刑中，佢亦涉及前年民主派初選案。