政情：立法會 重開實體會即報喜 陳祖恒弄瓦笑開眉

出席工務小組委員會嘅一眾議員聞喜訊，都鼓掌恭喜陳祖恒。盧偉國話實體會議順利舉行之餘，呢件事都好值得恭喜呀。及後，當議員們移步至會議廳開大會，本身已經有3個囝囝嘅陳祖恒，再度受到在場議員同事嘅祝賀，又一齊豎起4隻手指，以象徵佢迎來第4個小朋友。

陳祖恒表示，佢太太前晚入院，尋日朝早順利分娩誕下第4胎，係千金嚟嘅，佢又指醫院嘅防疫措施都做得相當充足。對於再次做爸爸，佢話好開心，笑言頭3個都係囝囝，而且慢慢長大。佢話老二同老大嘅年齡相近，約7、8歲，老三就嚟兩歲。佢透露兩個哥哥都想要個「細細佬」陪排第三嘅細佬，於是夫妻兩人就開始計劃生第4胎，點知無幾耐太太出現蘭夢之徵。陳祖恒認為係上天幫佢哋做咗決定，唔使諗咁多！至於今次係咪追女成功？佢話無諗過一定要生女，無論弄璋或弄瓦，一樣咁開心！

雖然立法會秘書處尋日話，已連續14日無錄得新冠感染個案，由今日起，疫情簡報只會有感染個案時方會發出。之但係，議員嘅防疫措施亦不宜鬆懈，勞工界議員周小松尋日出席工務小組委員會會議之前，就先行做咗一次快速測試，確定自己無中招先去開會。後來周更將自己嘅快測結果上載社交平台，指自己會繼續保持每日做快測，確保安全咁話。

至於議員顏汶羽同鄧家彪，就趁住出席實體會議嘅空檔時間，一齊過去中信大廈食晏。顏汶羽話早前不時喺抗疫活動中見到鄧，然而大家都係一身防護衣着「包到實」，尋日難得有機會除低口罩飲杯嘢，就梗係要傾吓選區內既貧窮、交通、同醫療等問題喇。