政情：財案諮詢躺平 無參與市民逾9成

香港民意研究所喺今個月8至13日，以電郵方式訪問5,685名12歲以上嘅香港市民，發現只有2%嘅受訪者有參與公眾諮詢表達意見，3%嘅受訪者就唔記得自己有無參與，換言之有高達95%嘅受訪者無參與過公眾諮詢啊。

至於消費券派發方面，有59%嘅市民支持政府派發多於10,000港元消費券，反對嘅就有15%；另外，又有35%嘅市民支持政府向未滿18歲嘅香港居民派發消費券，不過反對嘅受訪者就較多，佔38%。

浸會大學政治及國際關係學系副教授陳家洛質疑，政府多年來所做嘅公眾諮詢，究竟有幾多人參與呢？形容政府諮詢手法「躺平」、「走走程序」，政府往往只係約見幾個主要大政黨、社團、或者選委會成員收集意見，近年又經常以疫情做藉口，即使諮詢可於網上舉行但仍沿用落後方法。而漠視民意嘅結果，咪搞到施政效能不斷退步囉。