政情：開視像會唔跟規矩 謝偉俊拒認衰

按立法會最新要求，所有參與遙距會議嘅議員不但要留喺適當安靜嘅固定位置，且遙距會議進行期間，議員必須使用會議程式嘅「虛擬背景」功能，以顯示有顏色嘅背景，其中選委界議員須採用橙色，功能界別議員使用綠色，而直選議員則選用紫色。

至於身為選委界議員嘅謝偉俊，理應須採用橙色作為背景，而其他同界別嘅議員陳仲尼、黃元山等人都有用橙色。究竟喺咩原因搞到謝偉俊無用到呢？謝偉俊回覆傳媒時指，因為臨時要轉用手機開會，無儲存到背景圖片，所以出現技術困難，又稱明白規矩，但今次會議不涉及投票，唔認為自己作為議事規則委員會主席會立下壞先例喎！

其實委員會主席張國鈞一開始會議時，都溫馨提示咗一眾議員，指議員參與遙距會議進行期間，須使用會議程式嘅「虛擬背景」功能。不過謝偉俊今日會議並無發言，可能就令其他議員甚至係主席都發現唔到喇！