政情：分發防疫物資梁福元化身包裝工人

分發防疫物資，係近年相當常見嘅義工活動。十八鄉鄉事委員會前主席梁福元（福哥），日前就化身包裝工人，聯同一批義工將檢測用品妥善包裝，以待日後派發畀市民。雖則話包裝係手板眼見嘅簡單工夫，但疫情陰霾之下，都要講究衞生。

夥義工4小時完成千檢測包

話說福哥日前聯同多位義工，到元朗朗屏邨一所學校包裝新冠病毒快速檢測套裝，以便日後派發市民之用。不過所有參與包裝活動者，其住處必須係非確診樓宇，到達後要先量體溫、進行自助快速檢測，必須呈無染疫結果方可入內，跟住就要清潔雙手、穿上保護衣、頭套、鞋套、手套及面罩至可以埋位開工。而一眾義工喺跟足指引下，一個朝早就完成目標，4小時內包妥近千個檢測包。

要進行咁多防疫措施至可以開工，到底福哥會唔會嫌麻煩呢？佢話每日都會進行自我檢測，一早就已經習慣啦。