昔日東方政情：陳嘉朗炮轟 巴士?公帑填氹
疫情重挫運輸行業，近日有專營巴士公司大呻財務急速惡化，請求政府提供補助同豁免應繳費用，直至巿況恢復正常。不過綽號「巴膠」嘅油尖旺前區議員陳嘉朗，就認為相關巴士公司之所以陷入經營困境，其實係管理層經營不善，又呼籲政府切勿動用公帑去補助巴士公司，否則就變相將民脂民膏投入無底深潭。
雪藏機場巴嘥資源
陳嘉朗尋日到大嶼山一個巴士總站拍片，指一批原本行走機場線嘅巴士，已經喺該處「雪藏」咗一年以上。然而呢批閒置車輛所屬嘅巴士公司，去年竟然另購新車行走新開設嘅幾條過海路線，而閒置巴士就繼續存而不用，有如「天葬」！陳話一般巴士有18年嘅服役期，而呢批「雪藏」巴士嘅車齡只得6年，其實可堪再用，質疑相關巴士公司嘅管理層浪費資源，帳面上出問題就只懂得問政府攞錢，又形容政府並非「開善堂」，強調公帑都係來自納稅人嘅血汗錢。
陳嘉朗又重申，巿民毋須擔心冇巴士搭、司機同後勤維修無工開，事關政府按法例係可以暫時收回巴士公司嘅專營權，同埋徵用旗下車輛直至物色到新嘅經營者，所以政府唔提供資助，巿民就無巴士搭嘅情況係唔會發生！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
