政情：除舊物定環保？羅庭德議辦淪垃圾站

執屋迎新年，或多或少都會清走一啲家居舊物，若果人哋嘅「垃圾」掃晒去你門口，肯定好嬲，北區區議會主席羅庭德都遇到咁嘅情況，佢嘅反應係無奈。由於佢嘅議員辦事處兼作廢膠同紙品回收點嘅關係，年尾流流多咗一堆二手舊物，當中有好多都係難以轉贈或循環再用，點處理真係費煞思量啊！

食剩甜醋難回收

為響應環保，佢喺軍地嘅議辦係會代區內嘅回收商收集塑膠同紙品，但唔代表會收集舊電器同二手家居用品。佢話為免浪費，將可再用嘅舊物轉贈他人，但前提係必須有人要先至得。然而街坊喺議辦門外所放置嘅舊物，絕大部分都冇可能有人承接，譬如近日佢就收到殘舊嘅女裝鞋、殘缺嘅BB床床架，但咁都未算「極品」，以前佢仲收過福、祿、壽瓷像、食剩嘅半樽甜醋，甚至藥物都有。

佢話呢啲咁「騎呢」嘅舊物，連物主都嫌棄嘅話，又點會有人要呢？而就算收到外表乾淨同用得嘅二手電器，都要花時間做清理同包裝工夫，先至有人願意接收。所以佢呼籲街坊，若果打算喺佢議辦門口擺低舊物之前要諗清楚，否則同放喺垃圾站，又有咩分別呢？