政情：過完冷河 黃仲良轉跑道 搞鐵路

2015年嘅鉛水風波轟動社會，及後仍不時有大廈傳出發現鉛水情況。不過黃依家就唔再處理水務相關嘅工作，轉為處理鐵路事務。根據首長級公務員獲准停止職務後從事外間工作登記冊顯示，黃仲良喺上年11月初正式停止政府職務後，本月起獲九廣鐵路公司聘用，出任行政暨公司秘書部門嘅高級經理（Senior Manager - Administration cum Company Secretary）。

黃喺新工作上所負責嘅範疇同過去好唔同，包括要準備信函及年度報告等文件，就財務及庫務事宜提供意見，就鐵路合併交易所致嘅持續要求對公司進行監督及建議，及與港鐵協議服務特許權，及處理媒體與公眾查詢等。就此離職公務員就業申請諮詢委員會（諮詢委員會）亦提出批准申請嘅條件，包括黃喺工作過程中唔可以使用或披露喺政府任職期間，所取得嘅任何機密或敏感資料。

至於與黃同期晉升為建築署署長嘅余家慧，亦都喺上年12月中退休。佢今個月起會喺中大任榮譽建築師，為校園發展建設項目，提供獨立專業及建築方面建議。諮詢委員會同樣要求佢喺工作中唔可以使用或披露，喺政府任職期間所取得嘅任何機密或敏感資料。