政情：控制野鴿繁殖 陳炳洋有「絕」招

陳炳洋認為野鴿服避孕藥嘅缺點係，若野鴿有人餵飽之後就唔會食藥，同埋避孕藥要持續服食至奏效，一旦斷藥咁就前功盡廢。佢話要野鴿絕育其實仲有另一個方法，就係趁野鴿生蛋之後，搵隻假蛋去換咗隻真蛋，跟住隻野鴿就會掛住孵化隻假蛋而唔會再生其他蛋，咁就變相達到絕育嘅效果嘞！

之不過，點樣至可以收集野鴿蛋呢？佢話先決條件係要建造一個「鴿舍」。佢話根據自己童年養鴿嘅經驗，只要一隻鴿出去放飛，往往會多一隻鴿跟埋返嚟，話喺鴿群內部係會互通消息，知道邊度宜居就會呼朋引類，所以鴿舍必須坐落於合適嘅地點，而鴨脷洲渠務署污水泵房旁邊就有地方，可以建造容納一百隻野鴿嘅鴿舍。

至於檢視呢個方法嘅成效，佢就戴定頭盔咁話，因野鴿嘅壽命係3至5年左右，係要一段較長嘅時間去觀察，而唔係一年兩年。