要聞港聞

笑看天下:年金留番局長退休買

素有「神童局長」之稱嘅勞工及福利局局長羅致光,一直好努力咁推銷公共年金計劃,佢菩薩心腸,好驚港人長命過百歲,靠雞碎咁多強積金或有限嘅積蓄,唔夠「長命百歲」嘅生活開支,屆時就「全家都在風聲裏,九月衣裳未剪裁」,凍瓜餓死老婆仔女瘟臭屋,咁就大大鑊!所以,趁一口氣,點一盞燈,一定要買年金,一旦食到120歲,個個月有年金又兼享長生津,咁你就係人生勝利組!
羅局長唔認同外界質疑港府只為高收入人士着想,佢反駁指年金計劃嘅目標群組明顯係為低收入嘅退休人士而設,計劃入門金額只係5萬元;目前全港逾4,000人已購買公共年金,且同時領取長者生活津貼。羅局長以65歲男士為例,退休積蓄加上強積金合共50萬元,可保留35萬元現金,餘下15萬元則購買公共年金,每月領取870元年金,同時又符合資格,月領3,815元長者生活津貼。
依家物價指數上升,衣食住行樣樣難,長者退休若然要租住劏房,一個月攞4、5千蚊根本連飲粥水都難過!呢,從事社會研究嘅學者指出,目前全港有近40萬名65歲或以上嘅貧窮長者,貧窮率為32%,形容計劃對呢批長者「無乜用」;若「閒錢」只有十餘萬元,寧願把積蓄傍身應急。
40萬貧窮長者,相對於4,000人領長生津兼買年金,即係仍有逾30萬貧窮長者分分鐘無隔宿之糧,餐搵餐食餐餐清!阿哥,仲要求神拜佛,千祈唔好有急病,否則送去醫院,可能就咁揮一揮衣袖,不留一片雲彩就逍遙天堂!唉,仲講乜鬼長命百歲一定要買年金吖!局長,走出辦公室,真正考察民情,食吓人間煙火,腳踏實地為基層百姓做多點實事,年金留番你退休時買喇!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500