要聞港聞

政情:設交通小組衰收尾 離島區會爆火藥味

余漢坤強調並非要「邊緣化」任何議員。 余漢坤強調並非要「邊緣化」任何議員。
余漢坤強調並非要「邊緣化」任何議員。
由建制派主導嘅離島區議會一向較為平穩,無咩大拗撬,但最近卻因為是否成立交通工作小組,惹起紛端。泛民主派議員郭平早前因應東涌西發展迅速,建議成立東涌西發展交通配套工作小組,但誰知最終卻不獲通過,令外界揣測議員之間是否有不和。對於成立小組失敗,郭平解釋話,自己原意係為街坊服務,可能自己一廂情願咗,但強調問心無愧,相信係大家觀點唔同。至於區議會主席、鄉事派余漢坤就指,唔係「邊緣化」任何議員,只係因為再設工作小組會令職能重疊,減低議會效率,強調會再與郭平溝通。
身為交通及運輸委員會主席嘅郭平,喺9月27號嘅離島區議會上,提出建議成立第三個工作小組,討論東涌西交通發展事宜,因為自滿東邨及裕泰苑入伙後,東涌交通出現好多問題,希望成立工作小組以便委員與部門緊密合作。當時主席余漢坤就建議先草擬工作小組嘅職權範圍,再以傳閱文件方式進行表決。
郭平承認表決結果有好大落差,認為可能係佢自己一廂情願,話本身提供咗好多數據同文件畀議員做參考,佢都好多謝秘書處幫手整合同精簡文件。郭平指秘書處未有提供表決投票意向,但相信係同其他議員觀點唔同,強調問心無愧,仲有好多街坊聲音推動佢繼續做,不過嚟緊都唔會再建議成立相關小組啦。
余漢坤稱非邊緣化議員
郭平形容依家東涌西交通配套「一鑊泡」,假期時擠塞情況更加不堪入目,舉例位於滿東邨華德中書院後面嘅第42區及46區將興建7幢公共房屋,並會喺今年年底或明年初動工,相信到時交通情況將會更加混亂。
至於反對成立工作小組嘅主席余漢坤,就強調並非要「邊緣化」任何議員,只係現時委員會下已經有兩個工作小組,包括一個巴士路線工作小組,再成立第3個工作小組會搞到議題重疊,減低討論效率;加上本身嘅工作小組亦係常設,亦都可以按需要彈性開會,到時再討論埋東涌西發展交通配套。
余漢坤仲話東涌西發展亦有其他議題需要討論,包括房屋設施等,唔單單淨係交通配套,佢補充話議題原意係好,亦都唔反對討論,只係大家角度唔同,強調會再同郭平溝通,佢亦都覺得唔一定提出咗建議就要通過。
郭平(右)早前建議成立多一個交通工作小組,但不獲通過。郭平(右)早前建議成立多一個交通工作小組,但不獲通過。
郭平(右)早前建議成立多一個交通工作小組,但不獲通過。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500