政情：港台高層多變動 區麗雅離巢返新工

文件指出，區今年8月18日終止香港電台助理廣播處長（電視及機構業務）嘅工作，並於10月21日開始擔任皇家亞洲學會香港分會嘅兼職行政人員，主要工作範疇係同會員溝通、編製協會嘅刊物、協助預訂活動場地、管理會員數據庫等等。

離職公務員就業申請諮詢委員會批准區嘅申請，並提到幾項條款，包括區需要喺離職前休假終止，即係10月20日後先可以返新工，區亦唔可以參與競投任何政府土地、物業、計劃同埋合約，不能代表任何人擔任同任職政府最後3年期間涉及嘅政策制訂有關嘅工作，最後就係唔可以參與任何會令政府尷尬或有損公務員隊伍聲譽嘅活動喇。

區麗雅喺港台任職至少20年，署任唔夠一年就喺2016年坐正電台總監。李百全上任後，區一直被外界視為李嘅得力助手，但由4月開始就請長病假，期間由教育電視部出身嘅總監（電視）陳俊樂署理其位置。