昔日東方政情：黨友挽留 李華明話走唔走
就是否參與下個月嘅立法會換屆選舉，引發民主黨（白鴿黨）內部大分裂，作為主選派嘅白鴿黨元老、前議員李華明早前揚言，若該黨阻止黨員參選，佢就會退黨。結果民主黨提出有意參選嘅黨員必先通過甄選機制，但就無收到任何黨員報名。咁到底李華明仲會唔會退黨呢？佢就話暫時唔會退黨住，但就會繼續監察該黨嘅工作喎。
稱繼續做監察工作
李華明話，最近同九龍東嘅黨友傾過計，黨友一致挽留佢，事關大家係最親密嘅戰友，唔想佢離開，加上自己亦好多時幫黨友手，所以喺退黨一事需要再考慮一下喎。佢又話會視乎民主黨未來幾年嘅工作表現，以及自己仲有冇角色喺入面，將會保持監察，但目前呢一刻就唔會即刻退黨住囉！
對於李華明嘅講法，民主黨主席羅健熙尋日會見傳媒時就話，相信李已經放低咗退黨一事，又話希望對方明白黨內有政治上嘅分歧係正常嘅，想有多啲黨內溝通喎。羅又話，唔希望見到任何人退黨，笑言希望李可以繼續放低退黨一事啦。
另外，立法會換屆選舉下月舉行，有指多名非建制派參選人去信民主黨，爭取該黨容許黨員以個人身份表態支持，民主黨中央委員會尋晚會開會商討相關機制、個別參選人士嘅政綱、需要滿足民主黨邊啲條件等等。由於需要參選人回應是否接受條件，相信稍後至有確切結果。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
