要聞港聞

區會追薪冇下文 最冤都係納稅人

呢個政府至叻聲大大、冇貨賣!有嗰句,講嗰句,冇嗰句呢?由得佢囉!反正啲錢又唔係自己,最冤嘅咪又係納稅人!庸官習慣煙啤頭,堅定流?都唔使問阿貴,一定流!各位,功夫茶之所以咁大感觸,皆因政府至叻扮好打得,拳風虎虎,係配音!更加係銀樣鑞槍頭,中看不中用,風未動已先縮,龜咁模樣!
嗱!18區區議會宣誓已塵埃落定,當中147人成功「過關」,49人被政府DQ成「已完」!依家18區仲有得玩嘅人數合共151人。呢,政府喺宣誓前一早放風,指一旦被DQ,會被追討自上任計約逾百萬元薪津,引起民主派區議員有得震、冇得瞓,既然冇得博大霧,仲唔走得快、好世界咩!呢招放風果然使得,霎時引發逾200名區議員劈炮唔撈!阿哥,冇糧支仲要賠錢?世上有咁笨實嘅區議員嗎?
嘻嘻!原來政府扮鬼嚇人係work喎!碰啱咁多黃區議員嘅心又係玻璃做嘅!政府虛晃一招,又得咗!追薪方案影都冇,仲宣布所有區議員都會獲邀宣誓。嗱,如果黃區議員睇透政府根本係冇牙老虎,不自亂陣腳,坐定定等宣誓完先被人DQ,起碼出多一頭半個月糧喇!依家只能學大猩猩揼心口!
各位,政府「放風」慳水慳力,不必「落刀」已令絕大部分黃區議員雞飛狗走,乾手淨腳,撥撥被風吹亂嘅頭髮,又夠鐘出糧啦!呢,日前民政事務局局長徐英偉接受專訪時,冇正面回應「放風」一事,側側膊咁話,政府曾研究不同宣誓安排及追薪方案,無意「嚇走」區議員,佢嘅工作係要為區議員宣誓,安排一個穩妥嘅方法,又指「其實很多事情經常變」,希望盡快做完,畀大家專注區議會本身嘅功能喎!
「事情經常變」,阿哥,你講緊愛情吖?變幻才是永恒?難怪2016年宣誓風波中被DQ嘅前立法會議員游蕙禎,經過「和解」,佢欠嘅93萬元可以分48期還款,據悉,佢年度內只還咗17.5萬元,截至今年3月尾,連本帶息尚欠近103萬元。未知游蕙禎是否又深明「事情經常變」?搵到「靈魂伴侶」仲唔快啲嫁人咩?做咗人妻變得視錢財如糞土,反正唔還錢政府又吹我唔脹!變變變,唔還錢唔算賤!
講到尾,呢個政府向來大愛包容,一味和解,呢嗱!反對派立法會議員楊岳橋、郭榮鏗、郭家麒及梁繼昌,去年被DQ後共欠政府已支付酬金、預付營運資金等472萬元,「和解」後只收48萬了事,可恨納稅人又做咗冤大頭!事情經常變,唯一唔變就係高官無論做嘢幾咁hea,高薪厚酬唔變而「好官我自為之」,yeah !
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500