昔日東方政情：報咗渣馬 聶德權操到扯晒氣
渣打馬拉松去年因為疫情停辦，今年雖然規模縮細咗，但總算畀跑手有得玩吓。早前議員鄭泳舜同公務員事務局局長聶德權一齊跑城門河，但聶工作忙仲未決定跑唔跑渣馬，聶尋日喺Facebook（Fb）發布短片，仲自爆報咗渣馬嘅半馬賽事。
同一班跑手齊齊練
聶日前應約參與一個跑步計劃，同班年輕跑手練跑。佢話過往多數「獨自修行」，好少參加團隊操練。平時做開局長點人，今次就要喺後排跟着教練嘅指導，隨着學員訓練，佢話感覺都幾特別。佢又指自己當晚跑咗兩組練習，睇片都見到佢全身大汗，有少少上氣不接下氣。
佢又話自己成日跑沙田、大埔等地方，有時跑完沙田區「未夠喉」就會跑入馬料水、烏溪沙或者大埔。佢仲話希望之後有機會跑埋全馬添！但佢工作咁忙，唔知夠唔夠時間練跑呢？渣馬會喺今個月24日舉辦，距離依家仲有一個星期咋喎，聶德權掂唔掂o架？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
