政情：甄選機制出爐 民主黨有後着

消息指，民主黨尋日傍晚向黨員發出文件，交代參選黨內甄選機制嘅詳情，截止報名日期為10月11日下午6時。有意參選者須取得其所屬嘅地區支部20名會員提名，以及其餘4個地區支部會員聯合提名，仲要由中委會召開特別會員大會，獲得與會會員過半數支持，先至才獲推薦代表民主黨參選。而參選人唔可以成為自己嘅提名人，每名會員亦只能提名一名黨員參選。

有指在新選舉制度下有10個直選選區，但民主黨支部分布未有跟隨重劃，若參選九龍中或港島西則須橫跨兩個支部爭取提名，變相要爭取嘅提名達55個，比起其他選區共40個提名更多。

不過，就算取得足夠提名，甄選機制亦留有後着，譬如任何時候，如有包括嚴重違反黨紀之類嘅充分理由，已獲特別會員大會推薦嘅參選人，只要中委會全體在任成員嘅十分之六同意下，就會被除名。已被除名、暫停黨籍、退黨或退選嘅會員，若仍報名成為立法會選舉候選人的話，將即時喪失民主黨一切形式嘅支持。