政情：議員轟減碳減得少黃錦星死撐可達標

全球暖化引發氣候危機同經濟問題，環保人士認為地球要降溫退燒，必須大幅降低碳排放。立法會尋日通過由議員陳振英提出「推動實現碳中和」嘅動議，批評本港嘅減碳政策未如理想，敦促政府需訂下更進取嘅減碳排放策略，以及應對氣候變化嘅措施，加強公眾教育及宣傳碳中和相關知識，以及研究擴大綠色金融範圍。之不過，環境局局長黃錦星就指本港嘅碳強度，花14年時間減少35%，死撐話「目標係做到嘅」。

陳振英指本港碳排放喺2014年雖達到峰值，但政府減碳政策未如理想，又指現時各大銀行都以低碳營運，例如使用電子月結單減少紙張消耗，而政府應該研究、發展、提供誘因擴大綠色金融範圍。

花14年僅降35%

議員葛珮帆就話立秋後仍有酷熱天氣警告，指氣候變化影響日常生活，政府應帶頭以公私營合作形式，以及與內地鄰近城巿研究發展綠色基建，同樣指需要更大誘因推動碳中和。

黃錦星回應話，氣候變化係全球課題，而政府重視碳中和，稱2019年嘅碳強度比2005年減少35%，認為正相繼落實、邁步走向目標。而政府製作嘅「長遠減碳網上學習平台」已有13,000人次瀏覽；又稱可再生能源有助減碳，會積極探討粵港澳合作，政府會盡快公布新嘅香港氣候藍圖，以制訂減碳措施。黃強調推動減碳係政府責任，舉例指政府已經就綠色政府建築發出內部通告、綠色運輸方面推出電動車普及化路線圖等多方面減碳政策；廢物管理方面則希望極力發展轉廢為能。

減排裝置資助微

黃錦星一提到電動車，航運交通界議員易志明就有好多牢騷。易鬧爆政府不斷對運輸業開刀，要求業界淘汰老舊柴油車及安裝減排裝置，但可得嘅資助極少，形容係「政府出醬油，業界出雞」。易認為政府推廣新嘅電動交通工具時，不能操之過急，要考慮到業界嘅營運成本，又建議政府協助業界發展智慧交通，例如避開塞車路段等。議員陳克勤就話政府唔可以只將眼界放喺電動車，亦應多考慮其他新能源，譬如探討氫能嘅可行性，佢又指英國有城市亦正使用氫能巴士。