要聞港聞

區會宣誓第二場 又見政客醜態多

貪勝不知輸,全部變成豬。今個月10號港島區率先完成區議員宣誓,24人中有7人逃不過被DQ命運,其中蔡志強因缺席宣誓即日已被DQ,是以尋日政府刊憲,宣布港島區有8席懸空。其實喺宣誓儀式舉行前,已有傳舉凡牽涉「35 +」非法初選案或曾借出議員辦事處作票站、曾以政黨名義簽署抗爭聲明、曾參與黑暴被判囚,統統眾望所歸,冇得留低,勿謂言之不預也。
嗱,第二場區議員宣誓儀式照辦煮碗尋日早上喺北角社區會堂舉行,涉及九龍區5個區議會共56名現任區議員,當中29人屬攬炒派,只有深水埗區議員李文浩冇出席宣誓,其餘55人均有蒲頭。各位,29個攬炒派政客之中,究竟有幾多人會被DQ呢?當中李文浩已發聲明,廢噏一輪「鑑於局勢不可預測」而拒絕宣誓,扮晒蟹為自己臉上貼金,其實條友身有屎,去年曾同前區議員劉家衡喺辦事處外張貼「藍絲與狗不得內進」告示而惹起軒然大波,自己知自己事,與其被DQ不如自我DQ啫!
喂,港島區都有7人不符資格被叮走,九龍區照計冇奶油少過7人啩?好似同涉非法初選案、被控違反國安法獲准保釋嘅劉偉聰,以及未被起訴嘅「老鴿」涂謹申,扮晒莊嚴咁宣誓,若然咁都過到骨,真係大話都變成真!正如口痕友謂,呢班友仔反中亂港反到出汁,偏偏厚住面皮宣誓擁護《基本法》及效忠特區,如果唔係精神分裂,就係為五斗米折腰,最後只會自取其辱!是否如此,大家拭目以待啦!
呢嗱,政府晚上隨即發出聲明,表示對10名區議員所作宣誓嘅有效性存疑,當然唔少得涂謹申同劉偉聰。一睇名單,全部都係黑暴政客,靠黑暴上位,部分本身更係暴徒。睇怕唔使聽琵琶獨奏《十面埋伏》,呢10人都feel到兵凶戰危啦啩!
講真,有識之士都睇到區議會已經淪為政治鬥獸場,正經事唔做,終日黨同伐異,吵吵鬧鬧。之前傳出政府會向被DQ區議員追討過百萬元薪津,嚇到260人急急腳自行了斷,剩番211人自吹「留低比離開更有勇氣」,但在國安法及公職人員宣誓規定之下,料最終起碼有21人被DQ。分析指建制派將重奪6區主導權,之不過仍有多區因議員人數太少、正副主席懸空而無法運作,陷於停擺。
阿哥,依家區議會天殘地缺,即使又搞宣誓效忠,又搞改革選舉制度,其實醫番都係嘥藥費。倒不如參考當年取消市政局及區域市政局做法,殺之可也!慳番大筆公帑之餘,納稅人又樂得耳根清淨,何樂而不為!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500