昔日東方舊政府令人不滿 新一年務求快樂
新年快樂！新年快樂！功夫茶祝大家都新年快樂！
其實講真吖，點解一到新年就要祝人快樂嘅呢？呢個問題確係好值得大家深思㗎，事關冇先至要祝福，假如有就毋須祝福。舉個例子吖，你會祝七十歲嘅公公婆婆長命百歲，但係長命百歲呢一句祝福語絕對唔適用於一百零一歲嘅人瑞。
好嘞，新年之所以祝人快樂，道理好明顯就係平時唔係咁快樂，所以由冇希望變成有。至於點樣唔快樂咯喎，原因方方面面有公有私，個人而言離唔開工作同感情，整體而言就梗係同公眾利益有關啦。
港大民意研究計劃調查顯示，最多市民希望香港成為廉潔社會。民意係咁講嘅，如果要喺繁榮、廉潔、公平、自由同福利之間抉擇，百分之三十一受訪者最希望廉潔，數字係一九九三年調查系列開展以來嘅歷史新高。港大分析認為，或者因為前任特首、高官以至公職人員都被揭發涉嫌利益衝突。展望將來，市民認為政府最需要處理房屋問題，比去年同期明顯上升四個百分點。
眾所周知啦，前任特首曾蔭權爵士貪污醜聞纏身，好衰唔衰廉署查來查去都未查到個水落石出，最壞情況係刑不上大夫，結果係包庇縱容不了了之。喺呢個「痛心特首」嘅環境裏面，市民自然最希望香港成為廉潔社會。
港大調查又顯示，市民對香港過去一年整體發展嘅不滿比率，大升十一個百分點至百分之四十六，滿意率明顯下跌八個百分點至百分之二十五，滿意淨值係負二十一個百分點。好彩咋，香港人樂天知命，近六成市民表示過去一年活得快樂，比率與去年同期相若，快樂淨值係正四十六個百分點。
即係咁，香港整體嘅發展關乎特區政府嘅表現，表現差就令人不滿，不滿就導致不快樂。冇錯，近六成市民表示過去一年活得快樂，不過呢個數字僅僅顯示香港人氣量大方，並不顯示官僚稱職。尤其係舊政府涉及貪污醜聞，一定令人唔快樂啦！
仲有喎，社協同兒童權利關注會發表民間兒童專員報告，以一百分為滿分，兒童對於舊政府嘅評分只有六分，狠批貪曾政府重富輕貧。喂喂喂，兒童以赤子之心將舊政府評為六分咁大把，小朋友對於公眾利益嘅問題有乜可能快樂呀？既然平時唔係咁快樂，所以新一年就務求快樂，祝君新年快樂呀未來主人翁！
係嘞，新年一定要快樂，鬼叫前朝餘孽舊政府遺禍甚深咩。講到呢度，又係時候敦促梁振英新政府撥亂反正，消除舊患，創建未來，否則快樂嘅祝福冇機會好夢成真㗎，新年快樂！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
