昔日東方絲絲講場：諾獎得主批評馬斯克恃「財」傲物 似薯條哥
加密貨幣、特斯拉（Tesla）股票兩者有咩共通點呢？就係之前價格一度狂飆，今年反覆向下，跌到阿媽都唔認得！一向詞鋒銳利嘅諾貝爾經濟學獎得主克魯格曼（Paul Krugman）近月就連日喺佢嘅專欄討論呢啲現象，係強調「針對人唔針對事」下，點名FTX創始人「薯條哥」Sam Bankman-Fried，同埋超級富豪馬斯克之流，都係「任性寡頭」（Petulant oligarchs），即係恃「財」傲物咁囉。
克魯格曼引用名言「絕對的特權使人絕對腐化」，話呢啲人係特權擁有者，身邊人往往唔敢對佢哋講真話，好似馬斯克呢類習慣要乜有乜嘅有錢人，處處受到奉承，依家先發現自己唔單止光環盡失，仲成為大眾笑柄，其實唔需要意外。
「股價靠炒作及信仰支撐」
佢又將特斯拉股價同比特幣做比較，話兩者價格都係以炒作同信仰作為支撐。睇番特斯拉啲車唔似蘋果公司產品咁有一個完備嘅生態系統，亦都唔似微軟嘅文書系統咁廣受商業界使用，反而電動車競爭對手愈來愈多，仲話唔相信投資特斯拉股票「可以幫我賺錢買貓糧」。
畀人插得咁勁，馬斯克未見有咩反應，淨係向特斯拉員工發信致謝一年嚟嘅辛勞，要求為季績加油做好成績，咁市場就會睇到公司嘅價值云云。絲絲一於食花生，睇吓呢兩位猛人點隔空開火啦......
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
