絲絲講場：Airbnb CEO間房免費共享

據佢解釋，並唔係因為家陣通脹生活迫人而手緊出租物業，主要係察覺到近期市況、人們生活模式，令佢不期然諗起2008年金融海嘯、即公司創立初期面臨經濟大衰退嘅情況相似，所以佢決定再次下海，又指「我只是想講出租房間並不冒險，如果我都能做，你也可以」，咁即係變相以身作則，說服更多業主出租物業，以增加民宿供應。

身價飛升嘅Brian其實喺2007年同另一位公司創始人Joe Gebbia都曾經試過無錢交租，焗住出租只有充氣床墊嘅房間畀素未謀面嘅陌生人。事隔15載，Brian大方咗，將三藩市豪宅一間客房上架，有呢位尊貴CEO恭候兼唔介意同一屋簷下，又會分享下創業史等往事，仲話明會有私家金毛愛犬Sophie可陪玩、有自家製曲奇餅同咖啡熱情款待，賣點嚟講夠拍一個「真人Show」節目啦。

不過，真正嘅重點係，同「80後」CEO同居一晚係免費呀，所以Brian喺社交平台嘅貼文一出，都好難搵到可供預訂嘅日子。雖則佢本人已表示會想辦法再開放幾個時段以供大家預訂，但成個Package咁正，吸客量就梗係無得輸。姑勿論Book到房嘅幸運兒們會點樣回報CEO，呢招免費宣傳對公司品牌、租客都算雙贏，但就可能有啲做壞行規「頂爛市」之嫌。