絲絲講場：老債王格羅斯好火 抨新債王基金唔掂

如今已經78歲嘅一代債王依然「好火」，佢話舊東家太平洋投資管理（PIMCO）產品同一隻雙線總回報債券基金，今年分別下跌近17%和14%，就係由於太過跟足指數，基本上已變成指數追蹤ETF（交易所買賣基金）。美國超鷹派嘅貨幣緊縮政策，導致債券市場出現拋售，佢嘅指數基準，即係美國綜合債券指數，今年就跌咗16%。老老實實，個市跌個基金又跟住跌，咁我點解要幫襯你先？我自己輸錢起碼唔使畀基金管理費。

講番「總回報」策略係指收益唔單止來自資本增值，仲有來自收入，包括股息以及從固定收益投資中獲得嘅利息！

格羅斯話，一味追逐指數，並唔係「總回報」基金管理方法，仲認為佢哋顧住追指數，搞到呢類基金好難幫投資者保本。如果私人投資者選擇總回報基金作為老年保障，相信會喺跌市時期產生防禦性回報嘅話，「你被誤導了」。

而PIMCO網站介紹，總回報基金尋求「符合保本和審慎投資管理的最大總回報」喎。咁點做先至啱？對於投資者嚟講，投資通脹掛鈎債券嘅ETF係更好嘅選擇。至於總回報基金要點做好？格羅斯話：改名囉！至於岡拉克方面就冇任何回應。