昔日東方絲絲講場：港企闖元宇宙 首創寵物主題樂園
虛擬貨幣、NFT（非同質化代幣，Non-fungible token）同元宇宙，堪稱3大「虛幻經濟」。大家已經錯過晒前幾年比特幣（Bitcoin）由幾百蚊美金升到依家4萬幾蚊美金嘅大時代，就梗係望實其餘兩瓣有冇商機啦！
近排啲大企業炒NFT炒到天昏地暗，酒廠又話出NFT，連寵物都話整NFT。咁又係嘅，數碼化咗唔驚帶菌要被人道毀滅吖嘛！而呢個寵物NFT「Pet Paws」係本地薑嚟，由港產企業仍志集團創立。呢個寵物NFT持有者可擁有各種級別福利，NFT會籍仲可以喺第二市場上自由交易。
唔止咁，仍志旗下環球寵物世界同阿聯酋科技開發商Ammbr達成協議，將興建全球第一個專門為寵物和寵物主人提供服務的寵物主題公園，更會創造一個元宇宙，以香港島作為虛擬土地嘅起點。
印度新人辦虛擬婚禮
講到元宇宙，就不得不提印度，眾所周知該國盛產科技人才，不過大眾對於佢哋國民嘅印象就比較傳統保守啲。咁你就錯啦，喺當地東南部嘅泰米爾納德邦，有對年輕準新人就籌備緊一場元宇宙婚禮，又話結婚係兩個人嘅事，依家拖晒成個宇宙落水喎！
話說呢對新人2月將喺虛擬場地舉行數碼婚宴，邀請來自世界各地嘅朋友同家人參加。新郎哥原本就研究緊區塊鏈，所以對虛擬貨幣都有了解，而元宇宙係區塊鏈嘅派生技術，有一日睇睇吓影片見到元宇宙小知識，所以就想試吓囉。
佢哋搞元宇宙婚禮另一個原因就比較感人，係因為新娘爸爸喺舊年過咗身，無辦法親身見證個女結婚。於是新郎哥想創造一個外父嘅數碼形象，等佢可以一種「超脫肉體物理限制」嘅形式參與婚禮，話想畀新娘一個驚喜喎（不過依家通晒天啦）。新郎哥仲話，等外父以3D化身出現，喺元宇宙中祝福佢哋，呢份先係最好嘅結婚禮物。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
