昔日東方絲絲講場：譚仔目標出年日本澳洲開店
喺香港，「譚仔」米線品牌街知巷聞，本地市場做得十分成功。譚仔國際(02217)在港成功上市取得融資平台後，目標更要大搞海外市場，包括出年將喺日本同澳洲開分店！揀去日本就梗係明啦，話晒大股東係日本連鎖餐廳集團Toridoll，喺當地搭通天地線之餘，行政總裁劉達民仲話，依家東瀛時興一陣「麻辣風」，所以去到日本都有市場㗎。睇嚟遲啲通關後，絲絲可以「返鄉下」（遊日本）掃貨濕平外，仲可以去搵「譚仔姐姐」打卡喎！
研究洋人口味 冀進軍歐美
另外，考慮到外國人未必慣食「勿演」（墨丸），所以決定先去澳洲試水溫，希望可以較返個啱洋人口味嘅餐牌，為遲啲再進軍歐美鋪路咁話。
早前譚仔公布上市後首份中期業績就成績幾唔錯，劉達民話，基本上集團收益已經返到疫情之前，除咗堂食多番人之外，外賣客嘅生意仲有增無減，所以研究緊外賣手機應用程式（App），畀客人落單外賣自取。咁睇嚟係絲絲呢啲「外賣黨」嘅勝利，食晏時可以撳返碗「勿演三小」攞走！
其實，睇公司財報除咗知道佢嘅生意做成點，仲可睇到唔同地方嘅飲食習慣。集團首席財務官陳萍話，內地人比較鍾意叫多幾款小食；而新加坡叫米線配料就豪爽少少，通常都叫四、五款，加上物價又貴少少，所以兩地人均消費額分別係61.8元同85元。而香港人人均消費59.5元，因為港人食慣雙餸車仔麵，計番條數，兩個人一人嗌一碗雙餸米線加杯凍檸荼，再嚟多份土匪雞翼，又真係差唔多喎！
劉生話譚仔最好嘅一點係配搭夠自由，見過有客人因為健身要食多啲蛋白質，直接叫咗碗4份雞肉嘅米線。最近都希望食得「有營」嘅絲絲追問劉生，會唔會考慮出生菜底，答案就梗係話積極考慮啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
