昔日東方絲絲講場 :匯安擬改名懶豬股價升 變飛天豬
噚日有隻異動股股價升咗三成，就係GEM（前稱創業板）上市嘅匯安智能(08379)，至於有咩利好消息？收購？合併？業績好？統統都唔係，而係改名。
呢一刻，我同你都有個疑問，就係以為呢間匯安智能搵咗邊位風水大師幫公司改名轉運啦。非也。皆因佢個新名想改做「懶豬科技集團有限公司」，「懶豬有限」喎，咪幾好聽。
根據匯安智能年報，公司上市都有3年半啦，係從事生物特徵識別裝置嘅業務，包括人臉識別、指紋識別同虹膜識別等產品，自己仲做埋營銷。
冀為企業形象帶來新氣象
至於何解要改名，董事會解釋，建議更改公司名稱「將有助為公司之企業形象及身份帶來新氣象」，「將有利公司之未來發展」。公司嘅未來發展會係點，絲絲就唔清楚，不過話懶豬「有助為公司之企業形象帶來新氣象」，就未免太過新穎。
點解改個名（仲未經股東特別大會通過批准(o架)），股價會爆升？絲絲都搲晒頭。總之佢噚日最高升過44%，收市仍升31%，報0.118元。
講開公司名，廣東話源遠流長，諧音特別多，有時都咪話唔擇使。就好似依家叫北京能源國際(00686)嘅股票，以前係叫熊貓綠能，長寫熊貓綠色能源都唔錯，不過簡稱就好易引人遐想嘞。查實早年熊貓綠能都經歷過資金壓力，最後易主先搞得掂。
同一道理，內地車股吉利汽車(00175)明明個名咁好意頭，偏偏附屬公司叫做「吉利羅佑」，唔講住，痛痛哋。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
