絲絲講場：Facebook踩過界 夥Ray-Ban推智能眼鏡

美國社交平台Facebook（Fb）推出第一款智能眼鏡叫做「Ray-Ban Stories」，日後仲有機會提供真正嘅AR（擴增實境）眼鏡。呢款智能眼鏡入門款售價299美元（約2,332港元），有20多種款式可以選擇，包含不同的鏡片、5種顏色搭配，將會喺美國、加拿大、英國、愛爾蘭、意大利同澳洲上市。

智能眼鏡係Fb與太陽眼鏡雷朋（Ray-Ban）製造商Essilor Luxottica合作推出，搭配500萬像素的攝影鏡頭，佩戴者仲可以通過一個配套應用程式（App）直接將相片同短片分享到各式各樣社交平台度。

Fb之前因為對用戶數據嘅處理手法而受到批評，該公司表示，唔會未經用戶同意就透過智能眼鏡「偷窺」用戶平時睇開乜嘢，仲話將會為用戶提供「無廣告體驗」喎。

相機啟動時，眼鏡上面嘅LED燈會亮起，等其他人知道佩戴者正在拍照或拍攝緊短片。眼鏡仲跟咗份指南，話畀用戶聽應該如何「負責任地」使用智能眼鏡，比如喺公共廁所等私人空間應該關閉眼鏡，唔好將眼鏡用於騷擾或獲取密碼等敏感訊息之類嘅非法行為。

好多主要科技公司一早就開發各種智能眼鏡，但Google眼鏡因為太貴、設計「影響市容」同私隱問題，而銷情麻麻，亦都加深咗市場嘅憂慮。

之不過，今次有老牌Ray-Ban合作，至少設計型好多，有望增加勝算！