出山拍劇冇戲癮 陳凱琳教仔練演技 鬧人氣場勁

歌手陳明憙主演的myTV SUPER原創劇 《Cross My Mind》近日開拍，請來逾4年沒拍劇的陳凱琳（Grace）客串助陣，Grace說：「同監製講好耐冇拍劇，仲要用英文，監製話唔緊要，得幾句對白，拍完覺得幾好玩。」她笑言沒有戲癮，因要趕回家湊仔：「我覺得最入到戲嗰句對白係有少少鬧人，因為我成日鬧兩個仔『唔准打細佬』、『細佬唔准還手』，我好有氣場，哈哈！」又稱稍後離港數天與弟弟工作，踢爆老公鄭嘉穎相當擔心：「佢話有乜事發生點算！我話原來你咁依賴我，已經寫定餐單叫工人姐姐煮乜嘢。」

首次擔任連續劇主角的陳明憙表示：「我喺社交網見到有公開試鏡，所以寫電郵應徵。最辛苦係試鏡，兩個幾月嘅等待好漫長。」新劇全英語對白，難不到在加拿大長大的她，反而一場被襲擊的戲綵排了兩小時，拍攝後攰到爆！

此外，今年成立40周年的慧妍雅集與無綫共同製作《慧妍雅集 愛心傳承40年》特輯，逾40位成員出動拍攝，郭柏妍表示要到雞場收集雞蛋：「雖然我唔怕雞，但空氣中陣陣濃烈異味，拍攝1小時後覺得自己忍耐力好高。」隨後她與Grace合作炮製甜品，莊思明與李潔瑩處理活蝦時手忙腳亂，而梁凱晴則刀法如神，眾女合力烹調美味晚餐，答謝善長支持。