拉隊開《戰》「女一」陳瀅缺席劉佩玥攝位孭飛吸金買樓

無綫台慶劇《美麗戰場》昨晚首播，「女一」陳瀅竟然缺席宣傳活動，惟有「補飛」在巴黎鐵塔下拍片支持。劉佩玥多得拍檔林盛斌（Bob）帶挈，有錢齊齊搵，有望兩年內置業，陳曉華則感謝「阿媽」分享理財之道。

劉佩玥（Moon）、陳曉華、陳山聰、方力申及何依婷等，昨日在鑽石山宣傳昨晚首播的無綫台慶劇《美麗戰場》，女主角陳瀅身在法國出席時裝周缺席活動，但不忘在巴黎鐵塔下拍片為劇集打氣。Moon與陳曉華頂上孭飛宣傳，Moon笑說：「羨慕陳瀅去咗巴黎做嘢，自己有兩、三年冇去旅行，佢係勇者嚟，中間仲飛過兩、三次，不過只係今日缺席，之後就會返嚟。（叫陳瀅送手袋答謝？）呢幾年買嘢意欲都減少咗，目標係買樓。阿Bob開劇之前話有錢一齊搵，有樓一齊買，嚟緊同佢會有幾個工作，唔怪得陳瀅都話羨慕同阿Bob做CP。（儲夠首期？）努力中，入行以嚟都算節儉儲到錢，離目標已經唔遠，希望呢兩年完成買層樓畀媽咪嘅承諾。」

變咗陳曉華「阿媽」

問到陳曉華可有置業夢？她笑言拍劇多了個「阿媽」，日哦夜哦傳授理財之道：「阿Moon好好，分享咗好多理財知識畀我，除咗冇煲湯，真係好似我阿媽，希望30歲可以買樓。」劇中被「渣男」丁子朗糟質，問她能否組成CP搵錢？她笑說：「佢劇裏面摑咗我10巴，佢欠咗我嘅！」Moon取笑她當日拍完被摑戲，面色更紅潤漂亮，似是中了「還原靚靚拳」。

方力申受訪時指《美》劇是他第3套劇集，期待看到演出，有機會想多拍劇。對於傳緋聞的陳瀅缺席宣傳，他笑說：「原來女主角都可以飛得㗎？早知我都飛啦，我都想去美國、日本睇NBA季前賽。」他又爆導演葉念琛有「飛紙仔」情況，笑說：「導演有壓力先有好嘢，佢特登㗎。」而山聰講到在宣傳海報企正「C位」，笑稱阿Bob表示若由右數起，坐在最右的阿Bob才是「男一」！