《就是青春》改期狙擊《聲夢2》 大熱洪韻騏享受壓力 陳柏宇幫手打雜

節目原定9月24日開播，但現時改為10月2日，對正無綫的《聲夢傳奇2》決賽來打，而主要拍攝場景亦首度曝光，有長枱供參賽者做功課，又有梳化可以睇書休息，大有「家」的感覺！

4位「YOUnion」自我介紹，陳柏宇被參賽者一致認定為「Jason爸爸」，但他自稱團長、即高級打雜：「乜都做，需要搬搬抬抬就搵我，我都係咁對個女。」而曾樂彤是康樂組組長，會為大家舉辦活動。對於不少歌手做選秀騷令事業更上一層樓，如李克勤便打入內地市場，問陳柏宇會否有此希望？他說：「諗得太遠，當然希望，但唔係我Focus。」

拍攝當日，18位參賽者中只有17位現身，因林曉蕙確診新冠肺炎缺席，其餘參賽者狀態大勇，當中最具話題是劉庭君及未選已出歌的洪韻騏。劉庭君用半年時間踢走20磅，直言想管理形象，減肥方法以健康為主；就讀中四的她，由小學五年級開始作歌，現有15至20首作品。而被視為大熱的洪韻騏直言有壓力，但希望一直Keep住：「我最想畀觀眾睇到我唔同嘅一面，享受舞台最重要，我揀嘅歌都係我好想唱。（目標？）想留到最後！」

另外，有「翻版林家謙」之稱的康志維，曾參加ViuTV節目《全民造星II》，一度自覺是「隱形人」的他，今次參賽獲不少同伴支持，他亦覺得比以前更敢於表達，但當對住欣賞的陳柏宇唱歌時會比較緊張，要慢慢克服。